Kuwa 20 Mata 1994: Umwamikazi Rosaliya Gicanda yishwe n’abasirikare ba FAR

    0
    Aha ni Mwima ya Nyanza, aho Umwamikazi Rozaliya Gicanda ashyinguye (Ifoto JC Ndayishimye)

    Ku itariki ya 20 Mata 1994

    Umwamikazi wa nyuma w’u Rwanda, Rosaliya Gicanda, yishwe n’abasirikare ba Leta.

    Akanama gashinzwe umutekano kw’Isi k’Umuryango w’Abibumbye, katoye icyemezo 920, cyo kugabanya abasirikare ba UNAMIR, bakava ku 2500 kugera kuri 270.

    Mu Iseminari Nkuru ya Nyakibanda hishwe abapadiri b’abatutsi, abanyeshuri b’abatutsi bigiraga kuba abapadiri ndetse n’impunzi z’abatutsi zari zahahungiye. Bamwe mu bapadiri b’abahutu bagize uruhare mu kwicisha bagenzi babo.

    Abatutsi bari bahungiye kuri Paruwasi Rugango, ubu habarizwa mu Karere ka Huye, barishwe bose.

    Abatutsi bari bahungiye kuri Paruwasi ya Nyumba no kuri Komini Gishamvu byari byegeranye, ubu ni mu karere ka Huye, bishwe mu buryo ndengakamere.

    Abatutsi bari bahungiye muri Bukomeye muri Komini Ngoma, barishwe bose barashira.

    Kuva ku itariki ya 21-22/04/1994 Abatutsi bari bahungiye ku Gateme ka Cyarwa muri Komini Ngoma, bishwe urubozo, abagore bafatwa ku ngufu bikozwe n’Interahamwe z’i Cyarwa n’izo mu Mujyi wa Butare. Nyuma yo gutizwa umurindi n’ijambo Perezida Sindikubwabo Theordore yari yavugiye mu nzu mberabyombi ashishikariza Interahamwe n’abahutu gutsemba abatutsi.

    Jenoside yatangiye mu Mujyi wa Nyanza no mu nkengero zawo. I Busasamana, i Rwabicuma, mu Murenge wa Mukingo, i Mpanga n’ahandi.

    Kwirwanaho kw’abatutsi bahangana n’ibitero bije kubica, kwagaragaye ku misozi ya Nyamure muri Komini Muyira na Karama muri Komini Ntyazo hose ubu ni Akarere ka Nyanza. Bariyeri zashinzwe mu duce twose tw’umujyi wa Nyanza, abatutsi benshi bicirwa mu ngo zabo nta gitabara.

    Uwari Burugumesitiri wa komini Nyabisindu, Gisagara Jean Marie Vianney yagerageje guhumuriza abaturage anababuza kwitabira ubwicanyi, nyuma abajandarume baramwica kuko yabangamiraga umugambi wabo wo kumara abatutsi.

    Abicwaga bajyanwaga kujugunywa mu cyuzi cya Nyamagana cyangwa kuri Stade ya Nyanza ahari hasanzwe hamenwa imyanda. Jenoside muri Nyanza yayobowe n’abajandarume bafatanyije na Padiri Nsengimana Hormisdas wari umuyobozi wa Collège Christ-Roi i Nyanza, na Diregiteri wa ELECROGAZ i Nyanza, Mbereye Faustin, na Komanda w’abasilikare i Nyanza Barahira Pascal, na Komanda wa Jandarumori, Birikunzira François.

    Abatutsi bashyinguye mu rwibutso rwa Nyanza ni 20,011. Jenoside yahagaritswe ku itariki ya 28-29 Gicurasi 1994, Inkotanyi zirokora abatutsi bake bari bataricwa i Nyanza na Mugandamure.

    Abatutsi barenga 76 bo mu miryango y’Abasinga, ahitwa mu Kigarama, ubu ni mu Murenge wa Bweramana mu Karere ka Ruhango barishwe bajugunywa mu musarane.

    Abatutsi b’i Gitisi mu miryango y’Abahenda bishwe ku ikibitiro Jenoside igitangira muri Ruhango.

    Abatutsi bari bahungiye kuri Komini Karambo (Kibumbwe), bishwe n’Interahamwe n’abaturage b’abahutu, abarokotse uwo munsi zigaruka kubica bose ku ya 23/04/1994.

    Abatutsi bari bahungiye kuri Paruwasi ya Mugombwa muri Butare batangiye kwicwa. Mu Kiliziya hari abantu baturutse impande zose z’icyari Komini Muganza, Nyaruhengeri, abari batuye ku musozi wa Nyange hafi y’akagezi ka Kabogobogo.

    Mu Kiliziya ya Mugombwa, Padiri mukuru wayo TITIANO w’Umutaliyani yafungiranye abatutsi mu Kiliziya imiryango yose ashyiraho ingufuri ajya guhuruza Burugumestri ngo aze arinde umutekano wabo.

    Interahamwe n’abasilikare bahageze baciye imiryango ya Kiliziya bakoresheje imbunda na gerenade, bazana lisansi baratwika. Mu batutsi barenga 26,700 bari mu Kiliziya harokotsemo 5 gusa. Abayoboye ubwicanyi muri ako gace ni Ndayambaje Elie wari Burgumestri wa Komini Muganza, Singirankabo Viateur wari Konseye, Rwakaronkano wategekaga Serile , Bigirimana Petero wari umuserire, Mukundiye Yohani wari ukuriye Interahamwe, Kabirigi Antoine, Habiyambere Céléstin, Mbarushimana Emmanuel, Munyaneza Théobald n’abandi.

    Hari inkambi y’Abarundi mu Kagari ka Saga, Umurenge wa Mugombwa maze impunzi ziyivuyemo zifatanije n’interahamwe n’abasirikare bica abatutsi i Mugombwa. Perefe Col.Nteziryayo Alphonse wavukaga i Mugombwa, yakoresheje inama ku kibuga cya Paruwasi abwira abaturage ngo: “Urunze ivu, iyo ritinze ribyara umugina” ngo arabizi ko hari abagihishe abatutsi none nibatoragure n’abasigaye. Abari barahishwe n’abaturage, abana bato basigaye bazerera, biyoberanya mu bandi ntihagire ubamenya, barabarundarunze ku mabwiriza ya Col. Ntezeryayo Alphonse baricwa. Ibyo byabaye mu kwezi kwa gatandatu kujya gushira kuko nyuma y’icyumweru kimwe gusa, Inkotanyi zafashe ako gace. Jenoside yahagaze ku itariki ya 4/7/1994 ubwo Inkotanyi zafataga Butare.

    Abatutsi batari bahungiye ku Kiliziya ya Mugombwa bakusanyirijwe kuri Komini Kibayi baricwa. Ubu ni mu Murenge wa Mukindi mu karere ka Gisagara.

    Kuva ku itariki ya 20-25/04/1994, Abatutsi bari bahungiye ku musozi wa Nyamiyaga, ubu ni mu Murenge wa Rwabicuma mu Karere ka Nyanza, babanje kwirwanaho, nyuma baza kwicwa n’abajandarume.

    Hishwe Abatutsi mu Gisenyi (Nshili-Busanze) muri Perefegitura ya Gikongoro, ubu ni mu Karere ka Nyaruguru.

    Hishwe abatutsi b’i Kigenge muri Giheke (Cyangugu)

    Aya mateka tuyakesha Komisiyo y’igihugu ishinzwe kurwanya Jenoside, CNLG

    Tanga igitekerezo