CAF: Hakizimana Louis na Ishimwe Claude bazasifura imikino Nyafurika

    0
    Hakizimana Louis aheruka gusifura umukino wa Afurika y'Epfo na Senegal mu gikombe cy'Afurika cy'abatarengeje imyaka 20 muri Zambia (Ifoto/Internet)

    Impuzamashyirahamwe y’umupira w’amaguru muri Afurika yemeje ko amatsinda abiri y’abasifuzi b’Abanyarwanda azasifura imikino Nyafurika yo kwishyura, iriyobowe na Hakizimana Louis risifure muri Madagascar naho Ishimwe Claude muri Kenya.

    Hakizimana Louis, umusifuzi mpuzamahanga kuva mu 2012 azasifura umukino wa “CAF Champions League” uzahuza CNaPS Sport Football izakira Coton Sport FC yo muri Cameroun kuri CNAPS Stadium, Antananarivo muri Madagascar tariki ya 18 Werurwe 2017.

    Hakizimana uri gusifura igikombe cy’Afurika cy’abatarengeje imyaka 20 muri Zambia aho yayoboye umukino wo mu matsinda Afurika y’Epfo itsindwa na Senegal ibitego 4-3 azafatanya na Niyitegeka Jeaan Bosco na Ndagijimana Theogene.

    Irindi tsinda ry’abasifuzi b’Abanyarwanda bayobowe na Ishimwe Jean Claude rizasifura umukino wa CAF Confederation Cup, Ulinzi Stars Football yakira Smouha yo mu Misiri muri Kenya, ari kumwe na Niyonkuru Zephanie na Raymond Bwiliza Nonati.

    Ni umwaka wa gatatu kuri Ishimwe nk’umusifuzi mpuzamahanga, mu 2016 yari yayoboye imikino ibiri ya CAF Confederation Cup, FC Saint Loi Lupopo yo muri DR Congo itasinda Bandari yo muri Kenya 2-0 naho FC Mounana yo muri Gabon itsinda 3-0 Atlético Olympic Bujumbura.

    Umukino wo kwishyura wa Rayon Sports na Onze Createurs uzasifurwa n’Umunya Niger Hassane Abdou yungirijwe na Yahaya Mahamadou na Maman Raja Abba Malan Ousseini.

    Tanga igitekerezo