CNLG yagaragaje ibisa no gutekinika mu mibare y’inzu zubakiwe abarokotse Jenoside

    0
    321
    Dr Bizimana Jean Damascene asobanurira abasenateri raporo y'ibikorwa bya CNLG (Ifoto/Gaudence Umuhoza)

    Komisiyo y’Igihugu yo kurwanya Jenoside (CNLG) yatangaje ko ubwo yakoraga raporo ku bikorwa byayo ibijyanye n’imibare y’amazu yubakiwe abarokotse jenoside ntayo bari bafite ndetse n’aho ibonekeye ikagaragaramo kudahura.

    Umunyamabanga Nshingwabikorwa wa CNLG, Dr Bizimana Jean Damascene, yabivuze ubwo iyi komisiyo yitabaga komisiyo ya politiki n’imiyoborere myiza muri Sena aho yatangaga ibisobanuro ku mpamvu nta mibare igaragara y’amazu yubakiwe abarokotse jenoside agaragaramo.

    Dr Bizimana yavuze ko ubwo batunganyaga iyi raporo nta mibare bari bafite bitewe n’uko bibasaba kubanza kuyisaba zimwe mu nzego bakorana nka FARG ari na yo ishinzwe gushyira mu bikorwa iyubakwa ry’aya mazu nyamara ngo CNLG ikaba nta bubasha ifite bwo kuyaka raporo.

    Dr Bizimana yagize ati “Koko ntabwo muri raporo twashyizemo umubare w’amacumbi, ingorane twagize iya mbere amacumbi yubakwa na FARG, ubundi nta nshingano ifite zo guha CNLG raporo, kuba bataduha raporo rero biratugora kuko bisaba kujyayo kuzisaba ntizibonekere igihe, dutegura raporo yacu ntabwo twari dufite umubare w’amacumbi wuzuye twizeye dushobora kuba twashyira aha ngaha.”

    Aha Dr Bizimana yavuze ko bikwiye ko Sena yabakorera ubuvugizi inzego zikora imirimo yuzuzanya n’iyabo zikajya zibaha raporo z’ibikorwa byazo, gusa ngo ibi ntabwo bivuze ko badakorana kuko ngo iyo bagiye kuzibasaba n’ubwo biba byaratinze barazibaha.

    Dr Bizimana yagize ati “Ahatugoye handi ni uko hari imibare twagiye dukura mu turere twagereranya n’iyo twari dufite ya FARG tugasanga ntabwo isa neza hari itandukaniro ritari rinini ariko ukaribona, noneho tugasanga tutashyira muri raporo ikibazo nk’iki kitarakemuka. Reka mbahe urugero ruto iyo dufashe imibare dufite 2015 -2016, igihe twayandikaga wasangaga nko ku Karere ka Kamonyi imibare y’amazu yari akeneye gusanwa yatangwaga na FARG bavuga amazu 17 twabaza amakuru mu Karere ka Kamonyi bo bakaduha amazu 5, urumva harimo n’ikinyuranyo kinini, twajya mu Karere ka Muhanga FARG ikavuga amazu 28 akarere bakavuga 13, Nyamagabe ho itandukaniro si rinini FARG ivuga 16 akarere bakavuga 15, Ngoma ho FARG ivuga 17 akarere kakavuga 16.”

    CNLG ivuga ko n’ubwo utu turere ari dukeya iki kinyuranyo giteye impungenge ku buryo gikeneye gusobanuka kugira ngo humvikane impamvu yabyo niba ari amakuru yatanzwe nabi cyangwa ari ikindi.

    Dr Bizimana avuga ko kugeza ubu hafashwe ingamba ko aya mazu azajya yubakwa n’inkeragutabara ngo FARG ikaba yaragiranye amasezerano n’uru rwego ko ari rwo ruzajya ruyakurikirana kuko byagaragaye ko hari aho ba rwiyemezamirimo bayubakaga nabi bamara kuyubaka bagahita bigendera ntibigire gikurikirana

    Ati “Ahenshi hagaragaye ikibazo cy’isenyuka ry’aya mazu, ba rwiyemezamirimo bayubatse nabi bamara kuyubaka bakigendera inzu ikagenda yangirika ntawe uyisana uhari, ubu rero inkeragutabhara ziyemeza n’iyo havuyeho ipata bahora babikurikiranira hafi ibyo bikazatuma ayo mazu amara igihe.”

    Avuga ko umubare usigaye atari munini cyane hakaba hari icyizere ko mu gihe cy’imyaka 2 aya mazu azaba yaramaze kubakwa.

    Senateri Mukasine Marie Claire avuga kuri iki cyibazo hakwiye kubaho ubufatanye busesuye hagati ya CNLG n’inzego zose zifite aho zihuriye no guhangana n’ingaruka za Jenoside mu rwego rwo kubafasha guhuza amakuru ajyanye n’ibyo bakora.

    Uretse kandi ikibazo cy’imibare itagaragazwa muri raporo, abasenateri bananenze uburyo iyi raporo yanditswe aho bavuze ko amakosa agaragaramo ahora asa ku buryo hibazwa ubuziranenge bwayo.

    Perezida wa Komisiyo ya Politiki n’Imibereho myiza y’abaturage, Sindikubwabo Jean Nepomuscène, yagize ati “Ibibazo twabonye muri iyi raporo twabibonye mo mu gihe cyashize, ufungura ku ipaji ya mbere ugasanga ishakiro ari ryo ryakuyoboye ripfuye. Twe twari twavuze ngo turabasabira abashinzwe kwandika ibi bintu babirukane…hari igihe cyageze tugira umujinya ngo tukibasubize.”

    Umuyobozi wa komisiyo ya politiki n’imiyobore muri Sena Sindikubwabo Jean Damascene (Ifoto/Gaudence Umuhoza)

    CNLG ivuga ko ibarura ryakozwe mu mwaka wa 2013 ryagaragaje amacumbi akenewe ku barokotse jenoside angana na 3652.

    Mu mwaka wa 2013- 2014 hubatswe amazu1092, 2014-2015 hubakwa 622 naho 2015-2016 hubakwa 407.

    Tanga igitekerezo